Bursat europiane po ndryshojnë minimalisht gjatë sesionit të sotëm, ndërsa investitorët janë tërësisht të fokusuar te bisedimet mes Rusisë dhe Ukrainës. Në anën tjetër, vijon mbështetja nga vendimet e marra nga bankat qendrore më të mëdha në botë. Indeksi pan-Europian Stoxx 600 e ka nisur ditën në rritje të lehtë me 0.2%, ndërsa sektori i shitjeve me pakicë realizon fitimet më të mëdha, në rritje me 1.2%.
Pak progres është bërë deri më tani në bisedimet mes diplomatëve të Rusisë dhe Ukrainës, pas një dialogu 4-ditor, ndërsa në terren forcat ruse vijojnë bombardimet e qyteteve ukrainase. Ndërkohë, presidenti amerikan Joe Biden pritet të flasë ditën e sotme me presidentin e Kinës, Xi Jinping, dhe dy liderët do të diskutojnë luftën Rusi-Ukrainë dhe konkurrencën mes dy vendeve, sipas Shtëpisë së Bardhë.
Gjatë ditës së sotme, investitorët po presin fitimet tremujore të Porsche dhe JD Wetherspoon, ndërsa Banka Qendrore e Rusisë pritet të njoftojë vendimin e radhës mbi normat e interesit, në një kohë që ekonomia ruse është izoluar tërësisht nga sanksionet ndërkombëtare.
Lidion Kulla / SCAN
